Media24-personeellede landwyd het Mandela-dag gevier deur hul moue op te rol en by die hartklop van Suid-Afrika betrokke te raak deur nie net oor stories van hoop te skryf nie, maar dit ’n werklikheid te maak. Die dag het met ’n spesiale volbladadvertensie in Die Burger en Son afgeskop om pa’s, oupas en oupagrootjies te vereer. Media24 het met Mediclinic saamgespan en R94 000 aan Badisa geskenk, wat deel is van ons Ruimte om the Groei-projek. Die geld sal gebruik word om ’n ouetehuis in Milnerton, Kaapstad te help. Personeellede het ook peuselpakkies vir die Matha a Bana-projek verpak wat hulp verleen aan kinders wat verkrag is. Meer as 6 000 pakkies is geskenk.

Media24 het op 28 Junie 2012 sy Gee jou ruimte om te groei-projek by die Naspers-sentrum bekendgestel. Die groep skenk gratis advertensieruimte ter waarde van R24 miljoen in sy tydskrifte, koerante en aanlyntitels om die drome van 12 nie-winsgewende organisasies en 12 klein ondernemings in Suid-Afrika te help bewaarheid.

Altesaam 25 skole in die Oos-Kaap het onlangs 'n finansiële hupstoot van meer as R4 miljoen van die MultiChoice Fort Hare Inkwenkwezi Trust ontvang. Hierdie skole het aan 'n mentorskapprogram deelgeneem waar studente van die Universiteit van Fort Hare leerders in gr. 11 en 12 gementor het. Media24 se ondersteuning het ingesluit kantoorspasie vir die administratiewe span, toesighouding en implementering van die program, mediadekking en verskeie gemeenskapbetrokkenheidsprogramme in die Oos-Kaap met die ondersteuning van sake-eenhede soos Ads24, DRUM, Daily Sun en Destiny.

Media24 het Erfenisdag gevier met opwindende aktiwiteite by verskeie takke landwyd. Buiten die taalklasse wat vandeesweek begin het, kon personeellede ook eg Suid-Afrikaanse geregte by sommige kafeterias geniet, en is aangemoedig om te kom werk in tipies Suid-Afrikaanse uitrustings. Die Erfenismaandvierings is Vrydagmiddag by die Naspers-sentrum afgesluit met plesierige vermaak deur die Bamabanani Marimba Band, Die Kaapse Affodille en Loukmaan Adams, terwyl almal aan boereworsbroodjies gesmul het.

Uitgevat in voorskote en plastiekhandskoene, het Media24-personeel Maandag op Mandeladag met die bottermesse laat waai om toebroodjies vir 24 gemeenskapsorganisasies regoor die land te maak. Die bekende sjef, David Grier, Media24 se toebroodjiemaker, Thulani Lali, Prof Jakes Gerwel, voorsitter van Media24 en die Nelson Mandela- en Mandela Rhodes-stigting het 67 minute van hul dag afgestaan om hand by te sit met die smeer van meer as 10 000 toebroodjies.