Frontpage Slideshow | Copyright © 2006-2012 JoomlaWorks Ltd.

Nuus

  • Stap in Madiba se voetspore

    Dis vanjaar die 24ste herdenking van Nelson Mandela se vrylating uit die Victor Verster-gevangenis (nou die Drakenstein Korrektiewe Sentrum). Om die lewe van SA se nasionale ikoon te vier het die Drakenstein Korrektiewe Sentrum met die Drakenstein-munisipaliteit en Kaapse Wynland-distriksmunisipaliteit saamgespan om die vyfde jaarlikse 27 for Freedom-geleentheid op Saterdag 8 Februarie aan te bied. Jy kan kies tussen ’n stap- of drafresies van 27 km of 10 km. So nie neem aan die Vryheidsroete-pretstap of -draf van 5 km deel en volg die roete wat Madiba ná sy vrylating gestap het. Vir meer inligting oor dié pretdag vir die hele gesin en om vir die resies in te skryf klik hier. Maar opskud! Die sluitingsdatum vir inskrywings is Sondag 2 Februarie.

  • Prins Harry plus heerlike geskenke

    FAIRLADY spog vir die eerste keer met ’n man op die voorblad, en dis niemand anders nie as Brittanje se gewilde prins Harry. Binne deel die meester-patissier Eric Lanlard sy gunsteling-sjokoladeresepte met lesers. Daar is ook ’n afslagkoepon van Le Creuset en ’n paar stylvolle oorbelle in elke eksemplaar van die tydskrif. Die jongste uitgawe van FAIRLADY is nou te koop.

  • Kry nou jou kaartjie vir Skouspel Kaapsta

    Skouspel kom op 19 en 20 Julie vanjaar Kaap toe en dit gaan onvergeetlik wees. Verlede jaar moes toeskouers hul kans om Kurt Darren te sien verbeur toe hy in ’n ernstige ongeluk was waarin hy sy oog beseer het, maar vanjaar is hy terug saam met al die gunstelinge. Van die ander sterre wat by vanjaar se Kaapse vertoning gaan wees, is Laurika Rauch, Elvis Blue en Snotkop. Vertonings vind plaas om 13:00 op Saterdag 19 Julie en om 13:00 en 19:00 op Sondag 20 Julie. Kry jou kaartjies by Computicket of Shoprite en Checkers.

  • Lindiwe Mazibuko-biografie sien die lig

    Owning the Future: Lindiwe Mazibuko and the Changing Face of the DA deur Donwald Pressley is onlangs by Love Books in Melville, Johannesburg en The Book Lounge, Kaapstad, bekendgestel. Hierdie ongemagtigde biografie van die eerste swart mens wat aangestel is om die parlementêre opposisie in Suid-Afrika te lei, bied ’n belangrike oorsig oor die Demokratiese Alliansie kort voor vanjaar se verkiesing. Mmusi Maimane, die DA se premierskandidaat vir Gauteng, het by die Johannesburgse bekendstelling met die skrywer en Lindiwe gesels. Brent Meersman het ’n gesprek met die skrywer, Lindiwe en dr Mamphela Ramphele, Agang leier, by die bekendstelling in Kaapstad gelei.

  • Boek ’n móét vir kleinsake-eienaars

    Werk jy jouself gedaan, maar het min om daarvoor te wys? Is jou besigheid kniediep in skuld? Is jy by ’n kruispad, maar jy weet nie watter kant toe nie? As jou droom van ’n klein sakeonderneming vinnig besig is om in ’n nagmerrie te ontaard, is Your Small Business Nightmare and How to Wake Up vir jou geskryf. Die sakekonsultant en gewilde blogger Bertie du Plessis verskaf nugter, realistiese raad oor hoe om uit die skuld en op dreef te kom. Hy het in 1995 die konsultantonderneming MindPilot (Edms) Bpk® gestig. Sy kliënte sluit in JSE-genoteerde maatskappye asook verskeie klein- en mediumsakeondernemings. In 2010 was sy blog op fin24.com onder die top 10 gewildste blogs in die sakekategorie in Suid-Afrika. Vir meer inligting besoek mindpilot.co.za en bertieblogs.com.

  • Nuwe roman deur Connie Luyt

    In Meer as Een Grens deur Connie Luyt, die skrywer van Lang Skaduwees in Afrika, is dit weer die menslikheid en warmte van die vertellerstem wat jou opval. Die liefdesverhaal ondersoek die nadraai van die Grensoorlog in mense se lewens en die skaduwêreld van militêre intelligensie. Die roman is onlangs by Graffiti Books & Stationery in Pretoria bekendgestel.

  • Media24 bring hulde aan Mandela

    Op Vrydag 6 December het Suid-Afrikaners wakker geword met die nuus dat Nelson Mandela die aand vantevore oorlede is. Media24 se uitvoerende hoof Esmaré Weideman het gevra dat ’n oomblik van stilte om 12:00 by al Media24 se kantore gehou word. Sy het self ’n oomblik van stilte by Media24 se hoofkantoor by die Naspers-sentrum in Kaapstad gelei. Kort daarna het personeellede honderde wit ballonne vrygelaat. By Media Park in Johannesburg is ’n gedenkmuur opgerig waar personeellede boodskappe vir Madiba kon los. Media24 het Mandela se lewe ook op talle ander maniere gevier. Al Media24 se koerante het op Vrydag 6 Desember en oor die naweek huldevoorblaaie gebruik en talle het Nelson Mandela-bêrebylaes gehad. Die Burger het ’n toegewyde webtuiste met seldsame beeldmateriaal, foto’s en stemopnames en chronologiese inligting oor Mandela se kinderjare, huwelike en politieke loopbaan. Huisgenoot en YOU bring hulde aan Mandela in ’n spesiale verrykte digitale tydskrif wat sy lewe en nalatenskap deur middel van ’n interaktiewe biografie herdenk. Media24Tydskrifte Digitaal het ’n roerende aanlyn-huldevideo gemaak en ’n huldeboek waarin mense boodskappe vir Madiba kan skryf, is in die Naspers-sentrum se ingangsportaal gelaat. Maar die indrukwekkendste en blywendste eerbetoon is die ongelooflike fotografiese uitstalling in die Naspers-sentrum se ingangsportaal. Die foto’s is geselekteer uit Media24 se argiewe. “Hoe bevoorreg is ons as mediamense om sy lewe en werk – en nou ook sy afsterwe – te boekstaaf,” sê Esmaré. “Daar is nie ’n beter manier waarop ons aan Nelson Mandela hulde kan bring nie.” Die uitstalling is oop vir die publiek en Media24 nooi almal uit om hierdie wonderlike eerbetoon te sien.

  • Praghuldeblyk vir Madiba

    Donderdag 5 Desember was wêreldwyd ’n somber dag met die afsterwe van die geliefde staatsman, vredemaker en wêreldikoon, Nelson Mandela. Maar nêrens word sy heengaan meer intens gevoel nie as in Suid-Afrika. Om hulde te bring aan die wêreld se grootste leier nog het Huisgenoot, YOU en DRUM ’n pragbêreboek saamgestel wat Mandela se lewe en sy strewe na vryheid en demokrasie lewendig uitbeeld. Die Mandela-gedenktydskrif bevat 148 bladsye met foto’s en illustrasies wat alle aspekte van sy lewe dek, van sy geboorte, kinderjare en gesinslewe tot sy lewe as politieke vryheidsvegter, sy jare in die tronk, sy presidentstermyn en sy bydrae tot die samelewing as geheel. Die Mandela-gedenktydskrif is beskikbaar in winkels landwyd. Daar is ook ’n verrykte digitale weergawe van die publikasie met inligtingsgrafika en video- en skyfievertonings. Kry dit in die iTunes-winkel teen $4,99 (ongeveer R50, na gelang van die wisselkoers). ’n Digitale weergawe van die tydskrif is beskikbaar by mysubs.co.za.

  • Evita’s Darlings ontvang boekgeskenke

    Leerders van die voorbereidingskool Evita’s Darlings het ’n lekker verrassing gekry toe NB-Uitgewers verlede week met ’n vrag boeke daar opgedaag het. Die skool is in 2010 geopen en is een van The Darling Trust se opvoedkundige projekte op die dorp. Die skool se stigter en beskermheer, die satirikus Pieter-Dirk Uys, het ook ’n draai gemaak om te sien hoe 60 opgewonde kinders elk ’n boek ontvang.

  • Borrelende Boity die gunsteling-glanspersoon

    Die aktrise en TV-aanbieder Boitumelo “Boity” Thulo (23) is gekies as Suid-Afrika se gunsteling-glanspersoon in die 10de jaarlikse heat Hot 100 gewildheidskompetisie vir glansmense. Die internasionale ster wat die hoogste posisie op die lys behaal het, is Lady Gaga wat vierde is. Dit beteken vir die eerste keer in die geskiedenis van die kompetisie is daar drie Suid-Afrikaners in die drie topposisies. Die musikant en liriekskrywer Elvis Blue en TV- en radiopersoonlikheid Minnie Dlamini is onderskeidelik in tweede en derde plek. “Boity se borrelende persoonlikheid is aansteeklik, so dis geen wonder sy het so vinnig roem verwerf nie,” sê heat se redakteur, Andre Neveling. Boitumelo sê sy haar bestuurder, Lorinda Voges, het die goeie nuus aan haar oorgedra. “Ek het aanhoudend gevra, ‘Is jy seker?’ Ek kon dit nie glo nie!” Altesaam 55 nuwe glansmense is onder die heat Hot 100 en ’n ongelooflike 40 van die 100 glanssterre is Suid-Afrikaners. Vir al die besonderhede oor vanjaar se heat Hot 100 kliek hier of kry die jongste uitgawe van heat – dis nou te koop. Volg heat op Facebook (heatSouthAfrica) of Twitter (heatSouthAfrica).